La stagiun passada aveva cumenzà stupent per il Club da hockey Engiadina. L’equipa da l’Engiadina Bassa ha cumenzà il campiunadi uschè bain sco dapi onns betg pli. Lura è dentant vegnida la pandemia da corona e la buna partenza n'ha gidà nagut. L’emprim è il campiunadi vegnì interrut e suenter perfin annullà. Il pli gugent avess il Cdh Engiadina dentant giugà vinavant questa stagiun, gist pervia da la buna partenza.
In onn senza matschs da hockey
Avant in onn han las equipas da las ligas pli bassas dà l’ultima giada ina partida da hockey. Dapi lura hai mo dà trenaments. Tant pli grond è uss sa chapescha il plaschair da puspè ir sin il glatsch. Per il Cdh Engiadina ha la pausa sfurzada gì l’avantatg, che tuts èn daventads in onn pli madirs. Era ils giugaders giuvens. Per quels èsi impurtant da ramassar experientschas, il pli gugent sa chapescha durant partidas da campiunadi.
Giuvens han gia ina tscherta experientscha
Perquai ch'il dumber da giuvens giugaders da hockey en Engiadina Bassa è pitschen, han ils giuvens gia spert da dar en l’emprima equipa. Uschia èn en vista a la nova stagiun gia in pèr giugaders giuvens en l’equipa che han gia dà sin quest nivel. Per il mument va quai detg bain, ed en futur spetgan lura puspè annadas pli numerusas, cun dapli giugaders, che pon far part insacura a l’emprima equipa.