A Paris han gì lieu ils campiunadis mundials da para-atletica leva dals 8 fin ils 17 da fanadur. Tranter auter èsi i per survegnir plazs da quota per ils paralimpics a Paris 2024. En tut datti 652 plazs da quota. Las meglras u ils megliers quatter atlets per disciplina survegnan uschia in plaz da quota per Paris 2024. Per la Svizra han fatg part 10 atletas ed atlets. En tut eran quai radund 1'700 atletas ed atlets da 120 naziuns.
Las Svizras ed ils Svizzers han procurà per bunas prestaziuns. En tut hai dà 14 medaglias svizras, 9 d'aur e 5 d'argient. Per ils paralimpics 2024 a Paris han las Svizras ed ils Svizzers uschia cuntanschì 6 plazs da quota.
Intgins muments da las prestaziuns svizras
Debrunner ha gì internaziunalmain il pli grond success
Cleramain las pli bleras medaglias ha fatg Catherine Debrunner en la sutga cun rodas cun en tut tschintg medaglias, e da quellas gist quatter dad aur. Ella è cunquai stada l'atleta cun las pli bleras medaglias a quests campiunadis. Manuela Schär e Marcel Hug han cumplettà il podest en il ranking dals atlets singuls. Sper quests trais atlets extraordinaris ha dentant er la siglidra en lung Elena Kratter gudagnà tar ses emprim campiunadi mundial argient ed ha uschia pudì confermà sia ferma prestaziun als paralimpics 2021 a Tokio. Per ina surpraisa ha procurà Fabian Blum ch'ha a ses emprim campiunadi mundial cuntanschì la medaglia d'argient.
A quests campiunadis hai dentant er dà ulteriuras surpraisas. Uschia ha per exempel Licia Mussinelli ch'aveva sa qualifitgà per il final sur 100 m da las meglras 8, ha dentant betg gudagnà ina medaglia. Plinavant ha Patricia Eachus cuntanschì il quart plaz en il final sur 1'500 m e cunquai segirà a la Svizra in ulteriur plaz da quota per ils paralimpics 2024.