Tar ils trais ultims campiunadis mundials ha il victur en il slalom gigant adina gì num Ted Ligety. Pervia d'ina blessura n'è l'American però betg ì a la partenza.
Suenter sis onns ha Ligety uss chattà in successur: Marcel Hirscher è sa curunà sco nov retg dal slalom gigant.
«Super! I ha funcziunà sco quai ch’jau hai gì planisà», ha l’Austriac gia ditg suenter l’emprim percurs. En la decisiun ha el nizzegià ses avantatg e surprendentamain bandischà ses cumpatriot Roland Leitinger e Leif Kristian Haugen sin ils ulteriurs plazs.
Ils skiunzs svizzers n'han betg cuntanschì in plaz da podest. Meglier Svizzer è vegnì Justin Murisier sco 8avel. I suondan Gino Caviezel sco 15avel e Loic Meillard sin plaz 21. Carlo Janka sto sa cuntentar cun plazza 22.
La trumpada da Pinturault
Ina giada dapli pareva la pista er da laschar suenter vers la fin dal segund percurs. Philipp Schörghofer (segund suenter il prim percurs) è crudà enavos sin plaz 5. Il topfavurit Alexis Pinturault da la Frantscha è vegnì 7avel.
Il segund percurs dal slalom gigant era vegnì spustà per ina mes'ura. La raschun è stà in aviun acrobatic ch'ha strivlà ina camera pendenta.
Il spurt final
I restan duas decisiuns als Campiunadis mundials a San Murezzan.
- sonda: slalom da las dunnas
- dumengia: slalom dals umens
Ils top 10 dal slalom gigant
Rang | Num | Naziun | Temp |
---|---|---|---|
1 | Marcel Hirscher | AUT | 2:13.31 |
2 | Roland Leitinger | AUT | + 0.25 |
3 | Leif Kristian Haugen | NOR | + 0.71 |
4 | Henrik Kristoffersen | NOR | + 0.76 |
5 | Philipp Schörghofer | AUT | + 0.85 |
6 | Matts Olsson | SVE | + 0.93 |
7 | Alexis Pinturault | FRA | + 0.98 |
8 | Justin Murisier | SUI | + 0.99 |
9 | Mathieu Faivre | FRA | + 1.05 |
10 | Riccardo Tonetti | ITA | + 1.16 |
RR novitads 11:00 / 15:00