Naziunal/Internaziunal - Witolinsch succeda a Del Curto
Il club da hockey da Tavau ha chattà in successur per Arno del Curto: Il Letton Haris Witolinsch suttascriva anc oz il contract fin la fin da la stagiun, quai ha il mainagestiun dal HCD Marc Gianola confermà sin dumonda da RTR.
Durant 22 onns era Arno del Curto il trenader, il chau e la vista dal club da hockey da Tavau. Suenter sis titels da campiun Svizzer e tschintg victorias tar la cuppa Spengler era
l’era Del Curto ida a fin
la fin da november.
Uss, trais emnas suenter la demissiun dad Arno del Curto, ha Marc Gianola confermà ad RTR tgi che daventa sussessur: Cun il letton Haris Witolinsch (50) turna in anteriur giugader da l'EHC Cuira puspè a Tavau – uss dentant betg per dar il derbi grischun cunter il HCD, ma sco trenader da la squadra da tradiziun grischuna.
Witolinsch era en discussiun da la bell’entschatta
Gia suenter il emprim gieu dal club da hockey da Tavau suenter l’era Arno del Curto aveva il president dal HCD Gaudenz Domenig menziunà il num da Witolinsch sco pussaivel successur.
Durant tut quest temp è Witolinsch restà il candidat preferi. Curt avant la cuppa Spengler ha il Letton survegnì la conferma dal HCD. Els sajan sa cunvegnids ad in contract fin a la fin da la stagiun.
Las staziuns da carriera da Haris Witolinsch
Avrir la boxSerrar la box
Haris Witolinsch ha cumenzà sia carriera sin il glatsch sco giugader da hockey:
Cun Dinamo Riga è el daventà gia durant sia emprima stagiun en la liga d'elita da la Russia vicecampiun.
Suenter la fin da l’Uniun sovietica e l’independenza da la Lettonia ha Witolinsch bandunà sia patria per dar hockey en Svizra tar Cuira.
Da là è il viadi i vinavant en America dal Nord e suenter intginas partidas en la NHL è Witolinsch puspè turnà en Svizra tar Rapperswil e suenter puspè per tschintg stagiuns a Cuira.
Suenter sia carriera activa ha Witolinsch dalunga lavurà sco trenader.
Uschia tranter auter tar Dinamo Riga e da la naziunala da la Russia, la «Sbornaja». Cun quella ha Witolinsch gudagnà la medaglia d'aur tar ils gieus olimpics da Pyeongchang.
