Naziunal/Internaziunal - Seraina Friedli en il cader naziunal da l’EURO
Il cader naziunal cun las 23 giugadras per il campiunadi d’Europa da ballape 2017 en l’Ollanda è enconuschent. La trenadra naziunala Martina Voss-Tecklenburg ha a chaschun d’ina conferenza da medias a Magglingen annunzià cun tge equipa ch’ella vul cumbatter al proxim grond turnier da ballape.
La finala betg dumagnà il davos pass en il cader naziunal han Julia Sierli, Florijana Ismaili e Barla Deplazes. Quest trio vegn dentant anc a trenar quest’emna cun l’equipa naziunala, sco er il quart goli Nicole Studer. Percunter è Seraina Friedli nominada sco goli da reserva. La giugadra engiadinaisa dal FC Turitg ha dà fin oz dus gieus cun la naziunala Svizra.
Il mardi, ils 11 da fanadur, vegn il cader cun las 23 giugadras a sa rimnar a Bad Zurzach. Ils 14 da fanadur sgola l’equipa naziunala direcziun Ollanda e quatter dis pli tard dattan las Svizras lur emprim gieu da gruppa encunter las Austriacas. Durant l’EURO è l’equipa naziunala da chasa en il quartier Fletcher Hotel Doorwerth-Arnheim.