La Svizra ha gudagnà il gieu per rang tschintg la sonda saira cunter la Norwegia cleramain cun 8:2. Tuttina è il turnier stà ina trumpada per las giuvnas Svizras. La finamira saja stada da cuntanscher il final, ha il trenader Aldo Casanova detg envers RTR.
I saja uss d'analisar quest campiunadi mundial e da guardar, tge che n'ha betg funcziunà. Forsa saja la gnervusitad stada memia gronda tar intginas giugadras avant ils agens fans, manegia Casanova. Mo en singuls muments dal turnier haja sia equipa vairamain mussà il meglier unihockey.
Il campiunadi mundial va afin la dumengia suentermiezdi cun il gieu per rang 3 tranter la Pologna e la Tschechia e cun il final tranter la Svezia e la Finlanda.
RR Sportissimo 12:00