Nino Schurter ch’ha gudagnà en questa stagiun tut las sis cursas da la cuppa mundiala ha triumfà als campiunadis mundials avant ses grond rival Jaroslav Kulhavy. En la davosa da set rundas ha Schurter, il campiun olimpic da Rio, attatgà e la finala distanzià il Tschec ch’è stà durant l’entira cursa a la testa cun Schurter per 7 secundas.
Jeu sai bunamein buca crer. Pli perfect sai buca ir. Vai era giu cletg che vevel mai problems cul velo. Ussa vegni grev las stagiuns che vegnan. I sa mattei buc'ir vinavon aschia.
Gudagnà la medaglia da bronz cun in retard da 15 secundas sin Nino Schurter ha in ulteriur svizzer, numnadamain Thomas Litscher ch’ha uschia procurà per ina da las grondas surpraisas. Quest trio è stà fin la davosa runda communablamain a la testa da la cursa dals umens d’elita.
Sper Nino Schurter han anc intgins ulteriurs Svizzers persvadì. Lukas Flückiger è vegnì 6avel, Reto Indergand 10avel e Florian Vogel 12avel. Al cumenzament dals campiunadis mundials veva Nino Schurter gia gudagnà aur cun la staffetta Svizra. Sper tut ses success en la cuppa mundiala ed uss en l'Australia ha il mountainbiker da Tersnaus er anc gudagnà l'entschatta da la stagiun il Cape Epic, in da las pli diras cursas da mountainbike sur pliras etappas en l'Africa dal Sid.
Svizra la gronda naziun en l'Australia
Per la Svizra èn quai gia stadas las medaglias 7 ed 8 a quests campiunadis mundials a Cairns. En in onn, il 2018, vegn lura cumbattì per medaglias als campiunadis mundials da mountainbike a Lai, avant l'isch-chasa da Nino Schurter.
Demonstraziun da Jolanda Neff
Il pli grond success da sia carriera ha Jolanda Neff pudì festivar als campiunadis mundials en l’Australia. Neff è daventada campiunessa mundiala ed ha uschia gudagnà ses emprim grond titel cun l’elita. La sportista da 24 onns ha mussà ina cursa perfetga, quai davent da la partenza, ed ha la finala declassà l’entira concurrenza. En la segunda runda ha Neff mess tut sin ina carta ed ha attatgà e pudì sa distanziar da tut las autras. La finala ha ella cuntanschì l’arrivada cun in avantatg da 2:23 minutas sin Annie Last da la Gronda Bretagna. Terza cun in retard da gia passa 3 minutas è daventada la Franzosa Pauline Ferrand Prevot.
RR novitads 08:30