Naziunal/Internaziunal - Neff e Spirig van per l’emprim aur per la Svizra a Baku

Jolanda Neff ha pudì sa distanzià da la concurrenza en la terza runda da la cursa da «Cross Country». En l’arrivada ha la victura dal classament generala da la stagiun passada gì in avantatg da passa duas minutas sin sia collega d’equipa, Kathrin Stirnemann. Stirnemann ha pudì sa metter atras a la fin cunter la Polacca Maya Wloszczowska ed uschia distanzià l’anteriura campiunessa mundiala per 5 secundas a l’arrivada.

Aur e ticket als Gieus olimpics per Spirig

Ina ulteriura medaglia d’aur per la Svizra hai dà als Gieus Europeics a Baku grazia a la triatleta Nicola Spirig. La Turitgaisa da 33 onns ha gudagnà il triatolon cun in avantatg da passa ina minuta ed e grazia a questa victoria gist era sa qualifitgada per ils Gieus olimpics da l’onn proxim a Rio en la Brasilia.

Premiera tenor giavisch

La premiera a Baku è grategiada per Spirig tenor giavisch. Or da l’aua è ella vegnida sco 14avla cun bun 30 secundas retard sin Rachel Klamer e Lisa Norden. Sin il traject da velo ha ella lura pudì prender suenter cun in effort al duo ollandais-svedais. Il Trio ha armonisà bain, uschia ch’ellas han gì in avantatg da passa 2 minutas e mez sin las concurrentas cura ch’ellas èn partidas per l’ultim traject, ils 10 km currer.

Spirig ha curt suenter accelerà il tempo ed ha uschia pudì distanziar Klamer e Norden. En l’arrivada ha ella gì in avantatg da 1:16 minutas sin la segunda, l’Ollandaisa Klamer ed ha uschia gudagnà suveran il triatlon als Gieus europeics a Baku.

RR novitads 12:00/14:00