Il tennis svizzer na vegn betg ord las letras grassas positivas. Suenter la qualificaziun da mezfinal da Timea Bacsinszky e la victoria da Stan Wawrinka al French Open persvadan ils cracs da tennis svizzers ussa era a Wimbledon.
Gist quater giugaders svizzers han cuntanschì ils otgavel finals al turnier a la Church Road a Londra. Quai è record. Anc mai ha in quartet svizzer cuntanschì il medem temp la segunda emna d'in turnier da Grand Slam.
Belinda Bencic e Timea Bascinszky cumenzan glindesdi il di dals otgavels finals. Stan Wawrinka dat circa las 16:00 e Roger Federer dat l'ultim gieu sin il Centre Court.