L’emprim titel da Grand Slam – quai po festivar la giugadra da tennis spagnola Garbiñe Muguruza. La quartmeglra giugadra dal mund ha gudagnà il final a Paris cunter la defensura da titel Serena Williams cun 7:5 e 6:4.
A medem temp è il gieu da la sonda stà ina revantscha per la terrada da l’onn passà a Wimbledon. La victura da 22 onns è l’emprima victura spagnola a Paris dapi Arantxa Sanchez-Vicario l’onn 1998.
Serena Williams ha manchentà ses quart triumf e sco gia als Australian Open il 22 titel da Grand Slam. Ella avess uschia battì il record da profi da Steffi Graf.
RR novitads 18:00