Plinavant ha il FC Bayern München vinavant ina lunga glista cun giugaders blessads. Da l’equipa da Pep Guardiola ston tranter auter Arjen Robben, Franck Ribéry, David Alaba, Holger Badstubere Sebastian Rode persequitar il gieu cunter Barcelona davent da la tribuna.
La speranza resta
Speranza dat a Bayern München ils dus davos gieus da chasa en la Champions League. Donezk e Porto èn vegnids declassada cun 7:0 respectiv 6:1. Er questa saira ston ils da Bayern sajettar almain trais gols en il temp regular da 90 minutas per insumma avair ina schanza da cuntanscher il final da la Champions League. L’adversari n’èn dentant betg Donezk u Porto, mabain Barcelona ch’è ina grondiusa furma e sin buna via da vegnir campiun spagnol.
Focus sin la defensiva
Il trenader da Bayern München Pep Guardiola emprova da restar optimistics. El manegia ch'i vali la paina da metter il focus sin la defensiva, era sche ses Bayern München sto gudagnar e quai cler. La devisa è da betg ir en il cuntè a Barcelona. Pertge nagin sa meglier che Guardiola, tge che schabegia sch'ins lai memia bleras libertads en l’attatga da Barcelona cun ils superstars Lionel Messi, Neymar u Luis Suárez.