Igl è l’emprim punct culminant da la stagiun sin ils passlunghists svizzers. A Tavau vegn cumbattì questa fin d’emna en in sprint ed en ina cursa da distanza.
Cologna e Livers partan pir dumengia
Il grond trumf svizzer a las cursas da chasa è Dario Cologna. Il Jauer ha gudagnà tut quai ch’i dat da gudagnar en ses sport. Sulet ina victoria a Tavau, quasi avant ses isch-chasa, manca anc en ses palmarès. Il sulet svizzer ch’ha triumfà ina giada al pe dal Flüela è Toni Livers, quai dentant avant passa 10 onns. Tant Livers sco er Cologna desistan sin il sprint e sa concentreschan sin la cursa da 15 kilometers en il stil liber.
Focus sin Laurien van der Graaff
Ina da las favuritas tar las dunnas en il sprint è Laurien van der Graaff. La mattadura locala ha gudagnà l’onn passà dus sprints da la cuppa mundiala e procurass uschia er gugent ina giada per in exploit avant ils fans da chasa.
Ils gronds favurits vegnan tant tar ils umens sco er tar las dunnas da la Norvegia. Johannes Hösflot Kläbo, Sjur Röthe, Didrik Tönseth, Martin Johnsrud Sundby, Emil Iversen u Therese Johaung, quai mo intgins favurits da l’armada norvegiaisa ch’ha dominà las emprimas cursas da la cuppa mundiala.
RR actualitad 17:00