Suenter ch'il HCD ha gudagnà il venderdi saira la partida cunter ils Rapperswil Jona Lakers, cun sajettar penaltis – hai la sonda danovamain dà in crimi da penaltis per il club dal Grischun. La buna fin n'è questa giada dentant betg stada en favur dal HCD.
Cunter il davos da la tabella Ajoie han ils da Tavau bain pudì egualisar en il davos terz in retard da 0:2. Quai grazia a gols tras Enzo Corvi en la 44avla minuta, e Dennis Rasmussen en la 49avla minuta. La lutga da sajettar penaltis ch'i ha la finala duvrà, ha il HCD lura tuttina pers – quai cun 2:3. Per Tavau ha tutgà sulettamain Matej Stransky, per Ajoie han fatg il penalti Guillaume Asselin e Philip-Michael Devos.
Malgrà questa terrada ha il HCD fatg il pass davent da plaz 7 sin plaz 6 da la tabella.
Las ulteriuras partidas
- Ambri - Bienna 4:3 suenter prolungaziun
- Berna - Genevra 5:7
- Lakers - ZSC Lions 5:2
- Losanna - Fribourg 5:3
- SCL Tigers - Lugano 6:4.
