20 onns èn il skiunzs svizzers ids a la partenza en il medem dress tenor las colurs da la Swisscom. Al cumenzament era quai dress quasi be en la colur blaua, pli tard èn las colurs cotschen ed alv anc vegnidas vitiers. Quella èra è uss dentant a fin. A partir da la stagiun 2022/23 partan Marco Odermatt, Beat Feuz u Mauro Caviezel en novs dress da cursa.
Il principal è ch’igl è in bun ed in spert dress.
Cun il dress da la Swisscom han atletas ed atlets da Swiss-Ski procurà per bleras emoziuns e gronds success. Durant quels davos dus decennis ha Swiss-Ski er gudagnà 44 medaglias olimpicas. Il resti da cursa vegn dal reminent producì dapi il 1977 en Svizra entras la firma giapunaisa Descente.
«In nov dress da cursa era il pli impurtant»
Era Franco Cavegn ha gì durant sia carriera sco skiunz d’elita differents dress da cursa. Ses dress preferì era il nair da la Swissair. Cun quel ha el numnadamain pudì festivar ses pli gronds success.
Stoffa erodinamica saja decisiva per in bun dress da cursa, dentant era la vegliadetgna d’in dress. Gia suenter ina giada purtar in dress, sa stenda la taila uschè ferm, che quel daventa plauns. Uschia eri per Franco Cavegn il pli impurtant, da survegnir per mintga cursa in nov dress da skis.