Roger Federer aveva gia annunzià ch'il Laver Cup vegnia ad esser l'ultim turnier da sia carriera. Federer na gioga però betg en la concurrenza single ma en il dubel – ensemen cun ses rival etern Rafael Nadal. Federer aveva gia giavischà ordavant da pudair giugar ensemen cun Nadal. Ussa han ils organisaturs dal turnier a Londra confermà ch'ils aspectaturs pon vesair «Fedal» sin la medema vart dal court.
Giugar mes ultim match cun Rafa è fitg spezial per mai.
Durant blers onns eran il Basilais ed il Spagnol gronds rivals. 40 giadas èn els sa duellads sin la tura dad ATP ed a turniers da Grand Slam – per part en finals legendars. Federer ha gudagnà 16 giadas e Nadal 24 giadas. Al Laver Cup da l'onn passà han els giugà l'emprima giada ensemen. Là avevani gudagnà cunter ils Americans Sock e Sam Querrey.
Esser part da questa partida istorica suenter tut che nus avain passentà, è per mai grondius e nunemblidaivel.
Venderdi saira giogan Rafael Nadal e Roger Federer sco part dal «Team Europa» cunter il duo american Jack Sock e Frances Tiafoe.
