Dapi il principi d’october dattan las dudesch equipas da la National League il campiunadi svizzer da hockey. Dapi l’emprim «bully» da questa stagiun èn tuttas equipas da la National League stadas pervia da cas da corona en quarantina. Las davosas duas equipas ch'il virus ha tschiffà èn il club da hockey da Tavau ed il SC Berna.
Duas partidas spustadas
Ch'il virus tschiffass era l’equipa dal HCD era per il mainafatschenta Marc Gianola mo ina dumonda dal temp. La regiun da Tavau aveva dacurt numerus cas da corona, uschia ha il virus era tschiffà giugaders da l’equipa da hockey.
Pervia da la quarantina han ins spustà duas partidas. Sch'il HCD po turnar suenter la quarantina puspè en il campiunadi, lura è l’emprima partida planisada la sonda saira ordaifer encunter Rapperswil.
I manca il ritmus
Pervia da la pandemia e la quarantina n'èsi betg pussaivel als giugaders da vegnir en in ritmus. Suenter ina partida giugada suonda savens in temp senza gieus.
Per il mument emprovan ils responsabels da spustar ils gieus che na pon betg vegnir giugads, sin auters termins. Il Club da Hockey da Tavau dat per exempel trais partidas durant l’emna tranter Nadal e Bumaun. Pervia da la Cuppa Spengler ch’è vegnida annullada è vegnida libra questa retscha da termins.