Las hockeyanas svizras perdan la partida per bronz als gieus olimpics. En il final pitschen perdan las Svizras cun 0:4 cunter las Finlandaisas. Cun 15 cunter 47 sajets sin il gol mussa er la statistica, che las Svizras han gì in cler manco offensiv.
Mezfinal
En il mezfinal dal turnier olimpic perda la Svizra cunter il Canada cun 3:10. Gia suenter 11 minutas manavan las Canadaisas cun 5:0. Tutgà per la Svizra ha duas giadas il chapitani Lara Stadler ed Alina Müller.
Victoria en quartfinal
La segunda giada suenter il 2014 è la naziunala da las dunnas sa qualifitgada per il mezfinal olimpic. Cunter la naziunala russa ha l'equipa dal trenader Colin Muller gudagnà cun 4:2. En il mezfinal fruntan las Svizras u sin il Canada u sin ils Stadis Unids. Il gol decisiv ha Alina Müller fatg en la 58avla minuta – 30 secundas suenter che las Russas avevan egualisà al 2:2.
Duas secundas avant la fin ha Alina Müller anc ina giada tutgà il gol liber al 4:2. Ils ulteriurs dus gols per la Svizra han fatg Phoebe Staenz (35avla minuta) e Dominique Rüegg (48avla minuta).
Igl è la segunda giada suenter il 2014 che las hockeyanas svizras sa qualifitgeschan per il mezfinal olimpic. Lura avevan ellas gudagnà la medaglia da bronz a Sotschi.