Il trenader da l'equipa naziunala da hockey sin glatsch Patrick Fischer ha prolungà ses contract sco trenader per duas ulteriuras stagiuns. Quai munta, enfin il campiunadi mundial en Svizra l'onn 2026. Era il trenader d'assistenza Tommy Albelin resta en ses uffizi dus ulteriurs onns. Sco quai che la Federaziun svizra da hockey sin glatsch scriva, sustegnian els il duo Fischer/Albelin malgrà las terradas da las emnas passadas. Questa stagiun ha l'equipa naziunala da hockey sin glatsch pers tut las nov partidas da la Euro Hockey Tour cunter las top-naziuns, concret cunter la Svezia, la Finlanda e la Tschechia. Vesì sin tut la stagiun ha la naziunala svizra pers schizunt 11 giadas. Fischer ha ditg suenter avair prolungà ses contract, ch'i saja in grond privilegi per el, e ch'el saja losch da vinavant dastgar accumpagnar l'equipa naziunala.
Siemi da campiun mundial
Il punct culminant sco trenader ha Fischer fin ussa gì il 2018. Lura era la Svizra sa qualifitgada per il final dal campiunadi mundial a Kopenhagen. Il final aveva l'equipa svizra lura però pers cunter Svezia suenter sajettar penaltis. Per la Svizra era quai pir la quarta medaglia d'in campiunadi mundial. Fischer aveva ditg suenter il campiunadi ch'insacura daventian ils Svizzers campiuns mundials.
La Federaziun svizra da hockey sin glatsch aveva engaschà Fischer sco trenader da l'equipa naziunala il december 2015.
