Cumenzà aveva la partida encunter Bienna meglier per il Club da hockey da Tavau. Il patrun chasa è vegnì sco ina furia or da la cabina. Gia a l’entschatta vuleva il HCD stgaffir fats clers a Tavau. L’emprima offensiva n’ha ha dentant betg purtà gols. Pli ditg che la partida durava e meglier che ils osps bernais èn vegnids en la partida. Tuttina ha Simon Knak pudì far l’emprim gol per il HCD. En il terz d’amez ha Bienna dentant egualisà il gieu, avant ch’il HCD ha puspè pudì ir en avantatg.
Chastids en il terz d’amez
A la fin dal segund terz ha Bienna pers in zichel la disciplina. Robin Grossmann e Noah Schneeberger han omadus incassà in chasti. Il HCD ha pudì dar cun tschintg encunter trais da Bienna. L’equipa grischuna n'ha dentant fatg nagut or da quella pussibilità. Curt ha er Mike Künzle stuì bandunar il glatsch. Quai pervia dad in check encunter Chris Egli da Tavau. Cun il chasti è el gist vegnì exclus dal gieu.
Purtar a chasa la victoria
Sco gia ils emprims dus terz, era er l'ultim terz in cumbat. Omadus equipas vulevan anc far insatge. Sco emprim èsi grategià al HCD dad ir cun 3:1 en avantatg. Bienna n'ha dentant betg dà si. Gia duas minutas avant la fin ha il trenader da l’equipa bernaisa, Antti Törmänen, prendì ses goli or dal gol ed uschia fatg plazza per in sisavel giugader. Uschia vuleva Bienna anc egualisar il gieu. En quella situaziun è quai grategià a Bienna da scursanir anc ina giada la partida. Per dapli n'hai dentant betg tanschì. A la fin ha Tavau victorisà ils osps cun 3:2. Cun questa victoria resta il HCD sin ina plazza da playoff.
Il resultat da l'ulteriur gieu:
- EVZ Zug – Fribourg-Gottéron 4:3