La fusiun dals dus clubs saja in pass istoric. Piranha Cuira, enconuschent per sia equipa da dunnas ch'è pliras giadas stada campiun svizzer e Cuira Unihockey, enconuschent per l'equipa activa dad umens en liga naziunala A van via communabla. Questa decisiun è vegnida enconuschenta l'emna passada. Bainprest vegnan las equipas a giugar unihoc sut il nov num «Floorball Chur United». Da metter tut sut in tetg haja duvrà ses temp. Stefan Caprez, president da Piranha Cuira, vegn a surpigliar il presidi da la nov'uniun. El è led che tut è la finala gartegià.
Igl è ina situaziun da partenza stupenta che nus avain ussa.
El vegn tranter auter sustegnì da Franco Battaglia. Quel è actualmain vicemanader da Cuira Unihockey e surpiglia en l'avegnir in post en la suprastanza da la uniun fusiunada.
Cun repassar las structuras vegnin nus er finanzialmain in pass vinavant.
Fin ussa han las duas uniuns mintgamai trenà en la halla da sport da la scola professiunala a Cuira GBC. Da nov vegn l'uniun fusiunada «Floorball Chur United» a trenar en la halla da sport Fortuna a la Ringstrasse a Cuira. La halla che vegn ad avrir sias portas l'onn proxim, porscha sin la tribuna spazi per enfin 1'600 aspectaturas ed aspectaturs ed ina infrastructura moderna. Quai vegn tenor Stefan Caprez ad augmentar l’attractivitad da l'uniun.
