Cun in terz plaz en la etappa finala gudogna il Russ Alexander Bolschunow il Tour de ski ch'è ì a fin en la Val di Fiemme. El ha renvià Sergej Ustjugow, ch'è vegnì en l'etappa finala 5avel, e Johannes Hösflot Klaebo (21avel) sin il segund e terz plaz. La victoria dal di va tuttina a la Norvegia. Simen Krüger gudogna avant ses cumpatriot Röthe.
Cologna finescha Tour de ski sco 7avel
Dario Cologna vegn 6avel en l'etappa sin l'Alpe Cermis. Per in plaz sin il podest da l'etappa finala han stgars 20 secundas mancà al Jauer. En il classament general ha Cologna pudì avanzar sin il 7avel plaz.
Tut en tut ha Cologna gia gudagnà quatter giadas il Tour de ski, la davosa giada l'onn 2018. Sin il podest è il Jauer stà set giadas. Strusch in auter currider ha marcà quella seria da cursas uschia sco el. Ultimamain èn ils passlunghists russ e norvegiais stads memia ferms per Cologna. Tuttina dastgia Cologna esser cuntent cun sia prestaziun ch'el ha prestà e mussà, di l'expert da passlung Adriano Iseppi.
Quai è propi puspè stà ina «super-tour» da Cologna. Ins sto er resguardar ch'el è circa 10 onns pli vegl ch'il rest dals passlunghists. (...) In 7avel plaz è ina enorm buna prestaziun d'in Dario Cologna.
Segund meglier Svizzer al Tour de ski è vegnì Jonas Baumann da la Val Schons. En l'ultima etappa sin l'Alpe Cermis è el vegnì 20avel e 20avel è el er en il classament general.
Ils resultats dals Svizzers sin l'Alpe Cermis
- 6avel Dario Cologna, classament general: 7avel
- 20avel Jonas Baumann, classament general: 20avel
- 25avel Roman Furger, classament general: 27avel
- 28avel Jason Rüesch, classament general: 40avel
- 32avel Beda Klee, classament general: 28avel
- 38avel Ueli Schnider, cllassament general: 33avel
Tar las dunnas ha gudagnà la Norvegiaisa Therese Johaug gia per la 3. giada. La suletta Svizra ch’ha terminà l'occurrenza quest onn è Laurin van der Graaff. La spezialista dal sprint da Tavau è vegnida 25avla.
RTR novitads 16:00+