A la festa federala il 2010 a Frauenfeld ha Kilian Wenger triumfà. Il giuven da 20 onns aveva tranter auter battì en la 5avla lutga ses grond idol Jörg Abderhalden ch’ha gudagnà gist trais giadas il titel da retg da lutga. En la lutga finala ha Wenger mess en dies en il resgim Martin Grab.
A la festa federala il 2013 a Burgdorf ha Matthias Sempach triumfà. En la lutga finala ha el battì ses collega Bernais Christian Stucki.
A la festa federala il 2016 ad Estavayer-le-Lac èsi vegnì en la lutga finala tar il duel tranter Matthias Glarner ed Armon Orlik da Maiavilla. Orlik avess gì la schanza da daventar l’emprim retg da lutga dal Grischun. Ma la finala èsi danovamain stà cun Glarner in Bernais ch’ha triumfà.
A la davosa festa federala il 2019 a Zug ha Christian Stucki encurunà sia carriera cun il titel da retg da lutga. Stucki ch’ha en sia carriera er gudagnà la festa d’Unspunnen e quella da Kilchberg ha uschia realisà il grand slam da lutga. En la lutga finala da Zug ha il Bernais battì suenter be 42 secundas il mattadur local Joel Wicki. Il Grischun Armon Orlik è vegnì terz.
La proxima festa federala da lutga è il 2022 a Pratteln en il chantun Basilea-Champagna.