Cun Joel Wicki ha la Svizra survegnì in nov retg da lutga. Dapi il 1986 è el l'emprim lutgader da la Svizra Centrala che daventa retg. En la lutga finala ha el mess en dies a Mathias Aeschbacher en in cumbat fitg activ.
Orlik: «Avess gugent gì anc dapli»
Armon Orlik finescha la festa federala cun in 6avel plaz e po uschia turnar a chasa cun in cranz. Per il Grischun è quai gia il terz cranz. En tut ha el gudagnà quatter lutgas, trais giadas ha el fatg in pari ed ina lutga ha el pers – lezza encunter il retg da la Festa federala da Zug, Christian Stucki. Cun sia prestaziun saja Armon Orlik cuntent, el avess dentant tuttina sa giavischà in megler resultat.
Per ils auters Grischuns – Christian Biäsch, Marc Jörger, Corsin Jörger e Roman Hochholdinger – n'hai betg bastì per in cranz. Els pon turnar cun in'experientscha dapli en satg.
Rangaziun finala
Ina festa gigantica gartegiada
La festa da lutga federala è la pli gronda occurrenza da sport en Svizra. Ils organisaturs han savì beneventar passa 400’000 visitaders a Pratllen. Bun 51’000 persunas han pudì persequitar las lutgas en l’arena. Malgrà las fullas da glieud ch’èn vegnidas a mirar ils megliers ‘nauschs’ da l’entir pajais, n'ha quai dà nagins incaps pli gronds. Tut ha funcziunà bain, dal concept da traffic, fin tar il concept da segirezza e l’alimentaziun. Er sche las colonnas davant ils stans da magliar ed las 1’000 tualettas mobilas eran tranteren magari lungas.
Il andament en detagl da la Festa federala da lutga pudais leger qua en il liveticker.
Themen in diesem Liveticker
- Quai èsi stà da Pratteln
- Wicki è in retg merità
- Armon Orlik è cuntent
- Ils fans grischuns
- Marc Jörger sto turnar senza cranz
- Joel Wicki è il retg da Pratteln
- Staudenmann, Schneider ed Alpiger ensemen a la testa
- Schneider sa tschenta a la testa
- Giger fa pari cun Sempach
- Wenger gudogna cunter Widmer