Portugal è out
Il campiun europeic dal 2016 è crudà or da la EURO 2020 en l'emprima runda da k.o. L'equipa dal superstar Cristiano Ronaldo ha pers l'otgavelfinal cunter la Belgia cun 0:1. Il sulet gol ha Thorgan Hazard, il giugader defensiv che dat tar Borussia Dortmund, fatg trais minutas avant la pausa.
Per la Belgia cuntinuescha il grev program: En il quartfinal fruntan ils Belgiais il venderdi sin l'Italia.
Tschechia en quartfinal
La naziunala da la Tschechia ha dumagnà la surpraisa. Il campiun europeic dal 1976 ha surprendentamain gudagnà cunter ils Pajais Bass cun 2:0. L'emprim gol ha Tomas Holes fatg en la 68avla minuta, il segund Patrik Schick en la 79avla minuta.
En il quartfinal frunta la Tschechia sin il Danemarc.
Carta cotschna per Pajais Bass
La scena ch'ha decis preliminarmain quest gieu è stada en 52avla minuta. Matthijs de Ligt era l'ultim defensur. Sulet cun in hands ha el pudì evitar che Schick giaja persul direcziun gol. Suenter ch'il arbiter da video ha intervegnì hai dà la carta cotschna per il ballapedist dals Pajais Bass.
Suenter quella partida è il campiunadi europeic a fin per ils Pajais Bass.
