La segunda fin d'emna da mars è mintgamai la fin d'emna dal Maraton da skis engiadinais. Millis amaturas e profis da passlung prendan sut ils skis il traject da Malögia enfin a S-chanf e sa mesiran in cun l'auter. Il tun da partenza per il 55avel maraton da skis croda la bun'ura dals 9 da mars 2025. RTR rapporta er quest onn live da la cursa populara dentant er avant e suenter da quai che capita a l'ur da la loipa, davart las preparativas e lascha vegnir a pled organisaturs e curridras.
Gudagnai ina partenza al maraton da skis engiadinais
Tgi ha gust da far part al maraton? Cun in zic fortuna avais Vus la schanza da gudagnar ina partenza per il Maraton da skis engiadinais 2025. RTR tira la sort tranter tut las participantas e participantas da la concurrenza. Enfin ils 9 da fevrer èsi pussaivel da far part, la victura u il victur vegn enconuschent ils 10 da fevrer 2025.
Emna da maraton
Il Maraton da skis engiadinais ch'ins po far sco maraton cumplain da 42 kilometers u sco mezmaraton da 21 kilometers è il punct culminant da l'emna da maraton en Engiadin'Ota. Sper quel vegnan però organisadas anc autras cursas:
- 2 da mars 2025 cursa da las dunnas: Cursa da 17 kilometers da Samedan a S-chanf cun partizipaziun feminina.
- 5 da mars 2025 sprint da giuventetgna: Sin in traject da 800 meters sa mesiran giuvenils ed uffants en il sprint, i va per tecnica e sveltezza.
- 6 da mars 2025 Cursa da notg: Cun partenza la saira las 19:00 vai sur 17 kilometers tras l'atmosfera nocturna da Segl enfin a Puntraschigna.
- 9 da mars 2025 mezmaraton e maraton: La cursa classica da Malögia a S-chanf (42 kilometers) e da Malögia a Puntraschigna (21 kilometers) è il punct culminant e final da l'emna da maraton.
Tut dal Maraton da skis engiadinais 2025
La pli gronda cursa populara en Svizra
Dapi il 1969 datti il Maraton da skis engiadinais che maina sur ils 42 kilometers da Malögia a S-chanf. Gia l'onn 1976 han ils organisaturs dumbrà dapli che 10'000 participantas e participants, oz èn quai radund 14'000 curridras e curriders che derivan da passa 60 naziuns. Al start dal 50avel maraton, il 2018 han ins cuntanschì il dumber maximal da 14'200 participants, per l'emprima giada insumma eri lura betg pli pussaivel da s'annunziar.
