Las medaglias:
- Beat Feuz (SUI) 1:42.69
- Johan Clarey (FRA) + 0.10
- Matthias Mayer (AUT) + 0.16
Ils Svizzers:
- 7. Marco Odermatt + 0.71
- 16. Niels Hintermann + 1.39
- 25. Stefan Rogentin + 2.26
Per quels trais Svizzers èsi ils emprims Gieus Olimpics. La proxima cursa dals umens è il Super-G, mardi en damaun da las 04:00 temp Svizzer.
La carriera da Beat Feuz
Beat Feuz ha uss in cumplet set da medaglias olimpicas. 2018 ha el gia gudagnà argient tar il super-G e bronz en la cursa rapida. El è il quart Svizzer che gudogna la cursa rapida dals Gieus Olimpics. Avant el èn quai stà:
- 1972 Bernhard Russi
- 1988 Pirmin Zurbriggen
- 2010 Didier Défago
Feuz è era campiun mundial en la cursa rapida, 2017 ha el gudagnà aur a San Murezzan. 2015 a Beaver Creek e 2021 a Cortina d'Ampezzo hai dà bronz. Plinavant ha el era gudagnà trais giadas aur tar ils campiunadis mundials dals juniors a Zauchensee 2007, quai tar la cursa rapida, il super-G e la cumbinaziun. Bronz hai dà en il slalom, sco era gia 2005 a Bardonecchia.
Resultats cuppa mundiala
Dapi ils 10 da december 2006 parta Beat Feuz a cursas da la cuppa mundiala da ski alpin. En tut ha el gudagnà là 16 cursas, 13 da quellas èn cursas rapidas.
| Plazzas sin podest | 1. | 2. | 3. |
| cursa rapida | 13 | 18 | 14 |
| Super-G | 3 | 1 | 4 |
| Cumbinaziun | 0 | 3 | 1 |
Dal 2017 fin 2021 ha el mintg'onn survegnì la culla pitschna da la cuppa mundiala en la cursa rapida.
Johan Clarey
Ina prestaziun tut speziala ha era il Franzos Johan Clarey mussà. Cun 41 onns è el anc gudagnà argient. El ha gia il record sco pli vegl currider che gudogna ina medaglia ad in campiunadi mundial, 2019 ad Are è el vegnì segund tar il super-G. ils 21 da schaner 2022 è el era vegnì segund tar la cursa rapida da Kitzbühel, ed ha cunquai mess in nov record da vegliadetgna per in plaz da podest en la cuppa mundiala. El aveva gia quai record ord l'onn avant, era cun in segund plaz a Kitzbühel.
