A Lech-Zürs en Austria ha Christian Hirschbühl gudagnà la cursa parallella. El ha cunquai gudagnà sia emprima cursa en la cuppa mundiala. En il final ha el battì ses cumpatriot Dominik Raschner ch'è stà il pli svelt en la qualificaziun. Cumplettà il podest ha il Norvegiais Atle Lie MCGrath.
Nagins Svizzers da la partida
Svizzers n'èn nagins stads a la partenza. Nagin dals sis skiunzs ha pudì sa qualifitgar. Il Svizzer ch'è vegnì il pli datiers ad ina participaziun a la cursa da dumengia saira è Gino Caviezel. Avant in onn è il Grischun anc daventà sisavel ad Arlberg, oz ha el manchentà per in dieschavel la classificaziun tranter ils 16 megliers.
Er betg participar a la cursa da dumengia saira han pudì Daniele Sette, Cédric Noger, Marco Reymond, Livio Simonet e Thomas Tumler.
