Il podest:
- Sofia Goggia (ITA) 1:46,47
- Stephanie Venier (AUT) +0,10 sec.
- Nicol Delago (ITA) / Mirjam Puchner (AUT) +0,34 sec.
Sofia Goggia gudogna sia emprima cursa rapida da questa stagiun e resta uschia a la testa dal classament en questa disciplina roiala. La Taliana ha uschia mussà ina reacziun sin l'emprima cursa dad ier a Zauchensee, in super-G, nua ch'ella era crudada ora. Per Goggia (31 onns) èsi la 24avla victoria en la cuppa mundiala, la 18avla victoria en la cursa rapida.
3 Svizras sut las top 10
Da las Svizra ha Lara Gut-Behrami procurà per il meglier resultat. La Tessinaisa è vegnida 6avla. Dà oda maun in plaz sin il podest ha Gut-Behrami en la davosa part da la cursa. Cun Michelle Gisin e Priska Nufer èn anc duas ulteriuras svizras classadas sut las top 10. La campiunessa mundiala en questa disciplina, Jasmine Flury, è vegnida 11avla e l'autra grischuna, Stephanie Jenal ha stuì sa cuntentar cun il 27avel plaz, quai che dat anc intgins puncts da la cuppa mundiala.
- 6. Lara Gut-Behrami +0,62 sec.
- 8. Michelle Gisin +0,70 sec.
- 10. Priska Nufer +1,11 sec.
- 11. Jasmine Flury +1,17 sec.
- 18. Joana Hählen +1,62 sec.
- 19. Delia Durrer +1,64 sec.
- 27. Stephanie Jenal +2,63 sec.
- OUT Corinne Suter
La dumengia stat anc sin il program a Zauchensee en l'Austria in super-G, la disciplina da parada da Lara Gut-Behrami.
