L’emprima cursa da la cuppa mundiala sin la pista Planai è vegnida organisada il 1973, ina cursa rapida che Franz Klammer ha gudagnà avant ils dus svizzers Roland Collombin e Bernhard Russi. Dus onns pli tard hai dà l’emprim slalom sin la Planai. Quel ha gudagnà l’Austriac Hansi Hinterseer avant il Svedais Ingemar Stenmark ed il Talian Piero Gros. Victur da record a Schladming è l’Austriac Marcel Hirscher cun tschintg victorias. El ha gudagnà quatter giadas il slalom ed ina giada il slalom gigant.
Millis e millis da fans
Dapi il 1997 è il slalom da notg in punct fix en il chalender da cursas da la FIS. Questa cursa che vegn era numnada «The Nightrace» e che vegn manada atras sut illuminaziun indirecta carmala onn per onn fin 50’000 fans a l’ur da la pista e sin las tribunas giganticas en l’arrivada e vi dal Hohenhaus Tenne, il pli grond local d’après-ski en l’Europa. Er giu dal tetg da quest bajetg persequiteschan onn per onn millis da fans quest spectacul da notg. Il slalom da notg a Schladming è uschia la cursa da la cuppa mundiala cun ils pli blers fans al lieu. Ils davos dus onns han er ils spezialists da slalom gigant dastgà ir a la partenza ad ina cursa da notg sin la Planai.
Schladming ha er gia manà atras duas giadas ils campiunadis mundials da skis, l’emprima giada il 1982 e la davosa giada il 2013. Ils campiunadis mundials avant 10 onns n’han però betg purtà bler cletg als Svizzers. Per els hai dà sulet ina medaglia d’argient entras Lara Gut-Behrami en il super-G.
