Gudogna il CB Lumnezia quest davos gieu da campiunadi a Vella encunter la segunda equipa da l’US Schluein Glion, èn ils Lumnezians promovids per la 3. liga. Tar in pari u ina terrada fa il CB Surses il pass en la liga pli auta.
I va en emprima lingia per gudagnar quest derbi – e betg per ir si en 3. liga.
Ils vischins da Schluein Glion na vegnan però betg a far simpel a Lumnezia. Quests derbis sajan adina extrems, i giaja adina dir sin dir, savens oss sin oss – manegia il defensur lumnezian, Remigi Collenberg. Il plaschair e la tensiun sin quest final è en mintga cas grond, tar giugaders e trenaders.
Insatge è dentant segir, sch’i tanscha ni sch’i na tanscha betg dad ir si en 3. liga, suenter il gieu vegni en mintga cas fatg festa a Vella. Il gieu da quarta liga tranter il CB Lumnezia ed l’US Schluein Glion II cumenza la sonda, ils 26 da zercladur, a las 14:00 uras.