Daniel Hubmann: L’encurunaziun da sia carriera?
8 titels da campiun mundial, 28 medaglias a campiunadis mundials, 6 giadas victur da la cuppa mundiala generala, 32 victorias da la cuppa mundiala e 38 giadas campiun svizzer. Daniel Hubmann ha en sia carriera impressiunanta gudagnà quasi tut quai ch’i dat da gudagnar en il sport da cursa d’orientaziun. E tuttina stat il sportist da 40 onns e bab da famiglia avant ina premiera. A Flem Laax spetga sin il meglier currider svizzer dad OL da tut l’istorgia ses emprims campiunadis mundials en l’agen pajais.
L’emprima giada che Daniel Hubmann ha dastgà partir a campiunadis mundials è stà il 2004, in onn suenter ils campiunadis mundials a Rapperswil-Jona. Tar ils davos campiunadis mundials en Svizra il 2012 a Losanna, è Hubmann lura stà sfurzà da persequitar las cursas be a l’ur, quai pervia dad ina blessura. Curt avant aveva el rut la tarschola d’Achilles.
Ma er en l’auta vegliadetgna da 40 onns ed en l’atun da sia carriera tutga Daniel Hubmann, ch’ha emprendì da scrinari, tar in dals cunfavurits a Flem Laax. L’october passa aveva el triumfà sur la distanza lunga tar il final da la cuppa mundiala a Claustra. Sur questa distanza parta el er als campiunadis mundials, e quai cun la finamira da gudagnar sia 29avla medaglia a campiunadis mundials.
Martin Hubmann: «I fiss er ina medaglia per il Grischun»
En vista als campiunadis mundials a Flem Laax ha Martin Hubmann, il frar giuven da Daniel Hubmann, fatg satg e pac e prendì dimora a Tavau. Per l’ina saja el uschia pli datiers da Flem, e per l’autra saja la regiun da Tavau ideala per sa preparar optimal sin quest punct culminant. In ulteriur aspect saja stà ch’el possia uschia er trenar dapli en l’autezza.
Per Martin Hubmann èsi uschia per il vair campiunadis mundials da chasa. E sch’el avess da gudagnar ina medaglia, lura fiss quai era ina medaglia per il Grischun, di il sportist oriund dal chantun Turgovia. Auter che ses frar Daniel, parta Martin Hubmann en la cursa da distanza media.
Il punct culminant da quests campiunadis mundials suonda il davos di cun la cursa da staffetta. Ed en quella dastgan ils dus frars Daniel e Martin Hubmann ir communablamain a la partenza. Quai saja in siemi che giaja en vigur, di Martin Hubmann ch’ha 34 onns. Gia il 2019 avevan els dastgà represchentar la Svizra en la cursa da staffetta dals campiunadis mundials en la Norvegia. Cun il quart plaz avevan els dentant manchentà ina medaglia. A Flem Laax hajan els perquai anc avert in quint, uschia Martin Hubmann.
