Al mountainbiker grischun Vital Albin è reussì in exploit en la pli impurtanta cursa da la stagiun. Albin è vegnì terz en la cursa da cross-country dals U23 al campiunadi mundial en il Canada. Vital Albin ha pers bun 2 minutas sin il victur e campiun mundial, il Rumen Vlad Dascalu, che valeva sco grond favurit.
Il Tessinais Filippo Colombo, che valeva sco con-favurit, ha gudagnà argent. El ha stuì ceder a Dascalu per strusch 2 minutas. Gia al campiunadi d'Europa a Brünn en Tschechia era Colombo vegnì segund – era là davos il Rumen Dascalu.
Il segund Sursilvan en la cursa dals U23, Ursin Spescha (Sevgein), ha stuì dar si la cursa. Betg anc cleras èn las raschuns exactas.
Sina Frei va per aur tar las giuvnas
La mountainbikra svizra Sina Frei è per la segunda giada campiunessa mundiala da las junioras sut 23 onns en il Cross Country. La turitgaisa da 22 onns, ha triumfà a Mont-Sainte-Anne en il Canada. Gia il 2017 aveva Frei gudagnà aur a Cairns.
RR novitads 23:00
