La Svizra perda il final cun 0:2
Era durant il davos e pli impurtant gieu da l’entir campiunadi mundial ha la naziunala svizra puspè mussà ina fitg buna partida. Adina era il duel in duel sin il medem livel. Il gieu davant passa 17’000 fans en l’arena a Prag ha cumenzà cun ina tscherta gnervusitad. Il squitsch da stuair gudagnar il davos gieu era palpabel, uschia che la Tschechia ha duvrà in mument per vegnir en il gieu.
Spert han las duas equipas dentant laschà da la vart la gnervusitad ed han giugà hockey – e quai sin in aut livel. Ditg era il gieu egualisà e la Svizra uschia datiers a l’emprim titel en l’istorgia. 10 minutas avant la fin dal gieu ha alura il superstar tschec David Pasternak fatg l’emprim gol. Il dus a nulla è alura crudà paucas secundas avant la fin en il gol vid. La Svizra ha bain pers la partida da final, dentant definitivamain gudagnà argient.
Kevin Fiala il giugader il pli custaivel dal turnier
Suenter il final ha il directori da la Federaziun internaziunala da hockey sin glatsch undrà Kevin Fiala sco giugader il pli custaivel dal campiunadi mundial. Avant el ha fin uss be Roman Josi, sco sulet Svizzer, survegnì questa distincziun. Era Josi è vegnì undrà a Prag: Sco defensur cun ils pli blers puncts da scorer fa el part dal «All-Star-Team».
Gieu da final cunter il patrun-chasa, la Tschechia
Gia las partidas da mezfinal da la Svizra e da la Tschechia eran in spectacul. Ils gieus dad omaduas equipas eran insatge dal meglier ch'ins ha vis durant il campiunadi mundial da hockey en Tschechia. Il patrun-chasa, la Tschechia, ha bittà or dal turnier cun in hockey frestg ed effectiv la Svezia.
L’equipa plaina da stars da la NHL ha procurà per ina vaira euforia da hockey en Tschechia. Tuts han spetgà da la naziunala da hockey tscheca la medaglia d'aur ed han sustegnì ella.
Sport attractiv ha dentant er la Svizra mussà. Suenter ils success en ils gieus decisivs cunter la Germania e cunter il Canada èsi stà cler: Questa squadra po da princip batter mintga adversari.
Grazia a las paradas da Leonardo Genoni en il final
En in mezfinal dramatic ha la Svizra battì il Canada cun 3:2 en la lutga da penaltis. L’um dal gieu è puspè ina giada stà il goli Leonardo Genoni. Il goli da l'EV Zug è vegnì adina meglier en la partida ed ha procurà per desperaziun tar ils attatgaders canadais.
Durant l’entir gieu ha la Svizra pudì giugar sin il medem nivel sco il campiun da record e defensur dal titel. Gist era perquai che la Svizra era ida cun dus gols en avantatg. Il Canada è dentant turnà en il gieu, uschia che la lutga da penaltis ha la finala stuì decider la partida. E quella ha la Svizra gudagnà grazia ad in goli oraifer. Uss spetga en il gieu da final il patrun-chasa, la Tschechia.
Il duel Canada – Svizra – in duel da siemi
Il duel tranter la Svizra ed il Canada, il campiun da record da hockey, è in duel da siemi. Il gieu è per ils giugaders da hockey svizzers in classicher. Avant sis onns, tar il davos success svizzer al campiunadi mundial da hockey a Kopenhagen, alura aveva la Svizra gudagnà la medaglia da bronz, aveva l’equipa dal trenader Patrick Fischer gudagnà la davosa giada in gieu decisiv encunter il Canada. Da lezzas uras era la victoria ina surpraisa.
Sis onns pli tard èsi in duel tranter duas naziuns sin il medem nivel. Ils giugaders clav da la naziunala èn er uss puspè da la partida. Roman Josi, Kevin Fiala, Nino Niederreiter u er Nico Hischier han tuts rimnà experientschas en la meglra liga da hockey dal mund, en la NHL ed èn uss pronts per ina ulteriura victoria cunter ils Canadais.
Victoria cunter «l’adversari da tema» – la Svizra batta la Germania cun 3:1
La Svizra è sa qualifitgada per il mezfinal dal campiunadi mundial en Tschechia. L’equipa dal trenader Patrick Fischer ha gudagnà cunter la Germania cun 3:1. Per la Svizra èsi l’emprim mezfinal dapi il 2018. Ordavant han ils Svizzers pers quatter giadas en seria cunter ils Tudestgs en la fasa da k.o.
L’um da la partida è stà Christoph Bertschy ch’ha gist fatg dus gols per ils Svizzers. En il mezfinal frunta la Svizra damaun a saira sin il Canada. En l’auter mezfinal frunta la Tschechia sin la Svezia.
Davos gieu da gruppa
La squadra naziunala svizra da hockey sin glatsch terminescha la fasa da gruppa sin posiziun dus da la gruppa A. L'equipa dal trenader Parick Fischer ha gudagnà il davos gieu da gruppa cunter la Finlanda cun 3:1. En il quartfinal da gievgia frunta la Svizra sin la Germania, pia sin l'adversari ch'aveva bittà or dal turnier ils Svizzers l'onn passà.
Las ulteriuras partidas dal quartfinal:
- Canada – Slovachia
- Svezia – Finlanda
- USA – Tschechia
Emprima terrada en la 6avla partida
La squadra naziunala svizra da hockey sin glatsch ha pers la 6avla partida dal campiunadi mundial en Tschechia. Cunter il Canada hai dà ina terrada da 2:3. Igl è l'emprima partida che la naziunala svizra ha pers tar quest campiunadi. Per ils quartfinal eran ils Svizzers però sa qualifitgads gia l'emna passada. Suenter la 5avla victoria eri cler: L'equipa dal trenader Patrick Fischer è ina runda vinavant.
5avla victoria – 8:0 cunter il Danemarc
La Svizra è sa qualifitgada anticipadamain per il quartfinal. Il team da Patrick Fischer ha era gudagnà la 5avla partida, quai cunter il Danemarc cun 8:0.
Suenter las tschintg victorias ha la Svizra 14 puncts e na po betg pli crudar or dals top 4 da la gruppa A. La Svizra ha cunquai cuntanschì per la settavla giada en seria il quart-final da las meglras otg equipas. I mancan anc duas partidas da gruppa, la dumengia dat la Svizra cunter il Canada ed il mardi cunter la Finlanda.
Quarta victoria – 3:0 cunter la Gronda Brittania
Al campiunadi mundial da hockey sin glatsch en la Tschechia ha la Svizra pudì festivar la quarta victoria en quatter partidas. Il team da Patrick Fischer ha gudagnà cunter la Gronda Britannia cun 3.0. Suenter l'emprim terz ha la Svizra manà gia cun 2:0, quai grazia als gols da Nico Hischier (4.) e Dean Kukan (14.) Il terz gol ha fatg il Grischun Nino Niederreiter en la 39avla minuta. Il trenader svizzer, Patrick Fischer sa mussa cuntent suenter la partida, vesa però era anc potenzial.
Grazia a questa victoria è la Svizra puspè a la testa da la tabella da la gruppa A cun 2 puncts dapli che la Tschechia ch'è sin plazza dus suenter la victoria da 7:4 cunter il Danemarc.
Terza victoria – 2:1 cunter la Tschechia
La squadra naziunala svizra ha era gudagnà sia terza partida. Quai cunter la Tschechia cun 2 ad 1 suenter sajettar penaltis. Kevin Fiala ha tutgà per la Svizra en la 14avla minuta. L'attatgader tschec dal HCD Matej Stransky ha gulivà la partida suenter 36 minutas.
En il sajettar penaltis han Fiala e Philipp Kurashev tutgà per la Svizra. Per ils Tschecs ha be Stransky tutgà.
Segunda victoria – 6:5 cunter l'Austria
Ils Svizzers han gudagnà cunter l'Austria cun in 6:5. Quai è la segunda victoria per la squadra naziunala dapi ch'il campiunadi mundial ha cumenzà en la Tschechia.
Il gol decisiv cunter l'Austria è dentant crudà pir en la davosa minuta. Marcà quel ha Nico Hischier, ch'ha fatg en tut trais gols en questa partida.
Bun cumanzament – 5:2 cunter Norvegia
La squadra naziunala da hockey ha cumenzà il campiunadi mundial en la Tschechia cun in success. Ils umens dal trenader Patrick Fischer han battì la Norvegia a Prag cun 5:2. L'emprim terz da la partida è stà stentus per ils Svizzers, suenter èn ils favurits vegnids sin turas.
Aifer stgars nov minutas han Romain Loeffel (25.), Sven Senteler (29.) e Tristan Scherwey (34.) sajettà la Svizra cun 4:1 en avantatg. En il davos terz ha il Grischun Nino Niederreiter lura anc marcà il 5avel gol svizzer.