La naziunala svizra sut 21 è en il quartfinal dal campiunadi europeic da ballape. Bain perdan ils Svizzers l'ultim gieu da gruppa encunter la Frantscha cun 1:4. Els profiteschan dentant che la Norvegia batta l'Italia cun 1:0. Grazia als dapli gols che la Svizra ha sajettà en ils duels directs encunter l'Italia e la Norvegia è il quart final da l'Euro realitad. L'equipa dal trenader Patrick Rahmen terminescha la fasa da gruppa sin il segund plaz davos la Frantscha.
Suenter il 2011 puspè en la runda da k.o.
60 minutas ha la Svizra giugà bain encunter ils Franzos ch'èn ids en avantatg cun 1:0 entras in penalti en la 16avla minuta. 10 minutas avant la pausa egualisescha Dan Ndoye per la Svizra. L'ultima mes'ura han las forzas mancà ed ils Svizzers èn vegnids terrads dals Franzos che han sajettà entaifer 15 minutas trais gols. Ina terrada ch'ils Svizzers pon svelt emblidar. Grazia als Norvegiais che fan encunter l'Italia il resultat ch'i ha duvrà per che la Svizra resta en il turnier. Na vess la Norvegia betg gudagnà exact cun 1:0 avessan ils Svizzers duì turnar a chasa. Uschia stat la naziunala sut 21 l'emprima giada dapi l'onn 2011 puspè en la runda da k.o. ad in campiunadi europeic.
En il quartfinal spetga sonda la Spagna sin ils Svizzers sut 21. Ils Spagnols èn gia vegnids 5 giadas campiuns d'Europa U21.