Thomas Pidcock, il campiun olimpic da Tokio, valeva sco il grond favurit. Quai vala lu er per il proxim punct culminant, la cursa dal campiunadi mundial a Les Gets en Frantscha. Cun Filippo Colombo ha almain in mountainbiker da Swiss Cycling salvà l'onur svizra. Colombo aveva gia gudagnà avant in onn la medaglia da bronz al campiunadi mundial a Novi Sad en la Serbia.
Buna prestaziun da Vital Albin
Il Lumnezian Vital Albin ha terminà la cursa sin il novavel plaz cun in retard da 46 secundas. En la setavla dad otg rundas ha il mountainbiker oriund da Tersnaus attatgà sin posiziun dus, n’è dentant betg vegnì da sa distanziar la la concurrenza. En la davosa runda han las forzas mancà per cumbatter per ina medaglia. Per Vital Albin èsi stà l’emprima cursa dapi bun in mais e suenter in’infecziun da corona.
6 Svizzers sut ils top 11
Ils Svizzers han en general mussà ina buna cursa. Cun Thomas Litscher sco tschintgavel, il defensur dal titel Lars Forster sco setavel, Andri Frischknecht sco otgavel e Joel Roth sco 11avel èn gist sis Svizzers classads sut ils top 11. Betg a la partenza èn stads Nino Schurter e Mathias Flückiger.
La sonda stat sin il program al campiunadi europeic a Minca la cursa da cross-country da las dunnas. Ils gronds trumfs svizzers èn Jolanda Neff, Alessandra Keller, Sina Frei e Linda Indergand.