Per Naomi Osaka èsi il 4. titel da Grand Slam en sia giuvna carriera. La Giapunaisa batta l'Americana Jennifer Brady en dus sets cun 6:4 e 6:3. Malgrà ch'il numer trais dal mund ha fatg blers sbagls hai a la fin tanschì senza gronds problems per sia segunda victoria a l'Australian Open.
Suenter sulettamain 77 minutas è la partida stada a fin. Gist a l'entschatta da l'emprim set ha Brady, ch'ha giugà ses emprim final da Grand Slam, fatg ina buna parita. A l'entschatta dal segund set è Osaka dentant vegnida pli segira, entant che Brady ha cumenzà a far blers sbagls.
A partir da glindesdi mida Osaka grazia a la victoria dal terz sin il segund plaz en la rangaziun mundiala.
