Il segund slalom gigant da la stagiun è stà in grond spectacul. Cura che Filip Zubcic è filà sco segund davos da la pista Gran Risa giu ed ha surpiglia la testa cun in avantatg da 2,07 secundas, han bain inqual gia quintà cun ina victoria surprendenta dal Croat. In spetgava dentant anc sin sia cursa: Marco Odermatt.
Marco Odermatt n'ha betg laschà irritar da la cursa da Zubcic ed è ì cun 0,19 secundas avantatg en l'arrivada. Cunquai ha el era gudagnà il segund slalom gigant da l'enviern e per la terza giada ad Alta Badia. Uschia n'è Odermatt vinavant betg da franar en sia disciplina da parada – malgrà il program stravagà da 4 cursas en 4 dis. Per Odermatt èsi la tschintgavla victoria da slalom gigant en seria e victoria numer 26 en la cuppa mundiala.
Nunspetgà bler fadias han gì Pinturault e Henrik Kristoffersen ch'ha fin ussa gì success duas giadas sin la Gran Risa (2019, 2021). Tant il Franzos sco er il Norvegiais ch'han anc pudì sa meglierar in pau suenter l’emprima cursa han gì sco sisavel e setavel stgars 3 secundas retard.
Ils ulteriurs Svizzers en ils puncts
- 10. Gino Caviezel +3.66 secundas
- 15. Thomas Tumler +4.45
- 16. Loïc Meillard +4.49
- 21. Fadri Janutin +4.98
