Er quest onn sto Sandro Simonet persequitar il segund percurs dal slalom dad Adelboden ord la chombra d’hotel, sco gia ils davos quatter onns. Il skiunz rumantsch da 25 onns n’è insumma betg vegnì sin turas ed ha terminà l’emprim percurs cun in retard da 2,42 secundas be sin il 35avel plaz.
I n’haja funcziunà nagut, quai gia a la partenza, uschia Simonet avant che bandunar l’arrivada cun il chau a bass. La devisa saja uss d’emblidar tant pli spert questa cursa e mirar enavant. Las proximas emnas spetgan ulteriurs classichers, l’emprim il slalom da Wengen, lura quel da Kitzbühel e be dus dis pli tard il slalom da notg a Schladming.
