Las duas Svizras èn stadas cun lur prestaziun las emprimas duas Svizras insumma en in final da 100 meters. Per ina medaglia n'hai dentant betg tanschì. Del Ponte vegn ferma 5avla e Kambundji è gist davos ella sin plazza sis. Gudagnà han las trais Jamaicanas. Elaine Thompson-Herah gudogna davant Shelly-Ann Fraser-Pryce e Shericka Jackson. Thompson-Herah ha perfin rut il record olimpic per in tschientavel, cun ses temp da 10:61 secundas. Ella è la segund svelta curridra dal mund.
Omaduas vegnidas segundas en mezfinal
Mujinga Kambundji è stada segunda en ses mezfinal, cun 10,96 secundas. Avant è er Ajla Del Ponte stada segunda, quai cun in temp da 11,01 secundas. Anc mai ha ina Svizra cuntanschì in final en ils 100 meters. Uss èsi gist stà duas enina.
Kambundji, la terza dal campiunadi mundial il 2019, sur 200 meters, è stada be in tschientavel pli plauna che ses meglier temp, ch'è fin venderdi anc stà il record svizzer. En l'istorgia da l'atletica leva, hai da fin uss be ina Svizzer en in final da sprint. Quai è stà Paul Hänni il 1936 sco quart sur 200 meters.
En il final stattan dasper las duas Svizras trais Jamaicanas, ina Americana, in'Ivuriana ed ina Brita. La sperta è stada Shelly-Anne Fraser-Pryce, cun 10,73.
