Muschkito – senza tabus
Igl era ils 11 da november 1990. Curt suenter las 18:00 lascha sgular la Televisiun Rumantscha per l’emprima giada ses «Muschkito» en las stivas rumantschas disadas enfin lura cun il groove patgific dal «Balcun Tort». L’idea: Far in’emissiun da giuvens per giuvens. La cumposiziun: Istorgias e piztgadas or da la penna dal trio Claudia Knapp, Gieri Venzin e Beat Manetsch. Il «Muschkito» daventa en ses curt temp d’existenza (1990-1993) ina garanzia per smirvegl e risadas, ma er piztgadas, irritaziuns e scandals – e quai da tala maniera ch’el fa ses ultim sgol gia il 1993. Il «Muschkito» vegn splattitschà suenter mo 13 ediziuns (l’emprim lungas, lura pli curtas e per finir cun curtischmas). Tuttina han las 420 minutas da sia existenza tanschì per daventar ina legenda, a la quala la Rumantschia sa regorda anc oz. 30 onns pli tard damai nairas uras da laschar reviver quel animal che deva da discutar da ses temp tant sco oz luf ed urs ensemen, apunta, il «Muschkito». Perquai as propona RTR questa stad ina revista sin temps glorius – cun l’autura ed ils auturs dad ina giada. Claudia Knapp, Gieri Venzin e Beat Manetsch s’inscuntran en cuschina e stiva sco da pli baud, cura ch’els devan alas a lur «Muschkitos». Questa giada dentant betg per far in nov «Muschkito», ma per laschar reviver ils muments-staila da lur «Muschkitos» dals onns 90: •Ils 27-06 è deditgà al «Muschkito – senza tabus» – cun semperverds sco l’istorgia da Bernard Cathomas, l’anteriur secretari da la Lia Rumantscha, che n’ha nagin pass rumantsch, e Vitus Huonder, che discurra amez ina ghirlanda da condoms da la forza affectiva da la sexualitad. •Il «Muschkito» è stà l’emprim magazin investigativ da la Rumantschia. Senza fatgs retschertgads naginas istorgias, gnanc da quellas per rir. Ils 04-07 discutan Claudia Knapp, Gieri Venzin e Beat Manetsch perquai dal «Muschkito– investigativ» – er cun la grond’istorgia dals Carigiets sfalsifitgads che la Tagesschau n’aveva betg dastgà mussar, il «Muschkito» percunter bain. •Il «Muschkito» ha piztgà senza remissiun in e mintgin en la Rumantschia. Fertant ch’ils ins rievan, han auters prendì or il mazza-mustgas per far fin cun l’insect impertinent. En l’ediziun dals 11-07 discurra il trio redacziunal dal «Muschkito e la critica». •Claudia Knapp, Gieri Venzin e Beat Manetsch han fatg il «Muschkito» - ed Arnold Rauch, René Schnoz e Bruno Cathomas al han dà lur fatschas. En la quarta part da la seria da stad ils 18-07 lascha il trio reviver il «Muschkito e sias fatschas». La seria ed insumma tut ils «Muschkitos» chattais Vus en la rait sut www.rtr.ch.
------------------------------------------------------------------------------------------- Es war der 11. November 1990. Kurz nach 18 Uhr lässt die Televisiun Rumantscha erstmals ihren «Muschkito» in die romanischen Stuben, die bis dahin am friedlichen Groove des Balcun Tort gewöhnt waren. Die Ide...
