Peter Zinsli, il retg da la musica populara

L'emissiun dad oz deditgain nus ad in dals gronds da la musica populara svizra e grischuna. Quai è Peter Zinsli, naschì ils 15 da zercladur 1934, che vess questa sonda ses 90avel anniversari. El è sta in dals protagonists impurtants da la musica populara, ha cumponì blers tocs e registrà numerusas plattas. El era savens giast en emissiuns da radio, per l'emprima giada l'onn 1958, e sia popularitad è creschida grazia a la televisiun, nua ch'el ha savì sa preschentar gia l'onn 1963. Da Zinsli datti blers semperverds, atgnas cumposiziuns e tocs enconuschents sco il «Wentalaschieber» ch'el ha interpretà en ses stil tipic e genuin. El era popular dapertut, in dils gronds stars da la scena da musica populara ed ha gì differentas furmaziuns. Sia emprima ha el fundà il 1959, ils «Bündner Ländlerfründa», lura las chapellas sco ils «Churer Ländlerfründa» e «Peter Zinsli und sini Ländlerfründa» cun differents musicants che l'han accumpagnà tut tenor occasiun en Grischun ubain giu la Bassa. E quai èn stà blers: Arno Caflisch, Silvio Caluori, Walter Hassler, Heiri Goethe, Ueli Mooser, Christoph Bucher, Martin Tanner, Hanspeter Jehli, Urs Glauser e Fluri Burger.