PFAS – il tissi dal tschientaner

Dapi passa 70 onns accumpognan nus pitschens gidanters chemics che guardan che tut restia pli cumadaivel e simpel per nus. Er uss durant il temp d’advent. U n’è quai betg bel, sch’ils brunslis e milanais na tatgan betg vi da la lastra e sa glischnan en in hui dal palpiri da furnel sin il taglier? E n’è quai betg bel da baiver in punsch chaud or d’in simpel cup da chartun a la fiera da Nadal e d’avair pes chauds e sitgs, malgrà ch’igl è fraid e bletsch?

Dentant quests schenis universals invisibels che fan che ni aua, grass u tschuf po tatgar vi da noss products han er ina vart stgira. Pertge questas substanzas chemicas cun il num PFAS èn uschè stabilas ch’ellas na van betg pli davent. Ellas sa derasan adina pli fitg en noss ambient e quai er en lieus che nus na vulain betg avair els sco per exempel en noss’aua, en nossa vivonda ed er en nus. E là tissientan els adina pli fitg noss corp a moda cronica.

Ils PFAS n’influenzeschan numnadamain betg mo noss ormons, nossa fertilitad e nossas genitalias. Els fan era donn als gnirunchels ed al gnirom, fan che nossa beglia s’inflammescha, augmentan il colesterin e pon la fin finala era far cancer. Quant gravanta che la situaziun è propi, era qua tar nus en il Grischun, e tge che nus pudain far encunter, pudais vus tadlar en la «Marella».