Ladina Cadonau: «L'amputaziun è stada in surlevtg per mai»

Dapi il 2019 viva l'Engiadinaisa cun ina protesa sut il schanugl sanester. Ella lavura sco tessunza tar Movimento, l'instituziun per persunas cun impediments a Samedan.

Dapi sia naschientscha haja il pe da Ladina Cadonau fatg difficultads. Suenter numerusas operaziuns durant 10 onns è ella sa decidida da laschar amputar il 2019 la part sut da sia chomma.

«Avant aveva jau adina dolurs. Era cun far sport u giugar cun mes uffants. Mal, mal, da bunura fin saira e quai durant decennis.»

Grazia a sia tenuta positiva e ferma voluntad, ha Ladina Cadonau puspè cumenzà a lavurar suenter il temp da rehabilitaziun, entant cun ina protesa. Il star en pe tuttadi è però daventà cun il temp memia pesant, uschia che la dunna da 58 onns lavura uss il terz onn tar Movimento a Samedan sco tessunza. En l'instituziun per persunas cun impediments sa senta ella fitg bain.

«Per mai èn ils collavuraturs e las clientas da Movimento simplamain sco ina gronda famiglia, tut è uschè cordial. Insatge ch'ins po ir a tschertgar ditg en auters lieus da lavur.»

Durant sia vita haja ella passentà bels muments, sco per exempel las naschientschas da ses dus figls. Dentant hai era dà temps fitg difficils e pesants, nua che Ladina Cadonau ha era consumà excessivamain alcohol, per supprimer ils problems.

Oz abita la dunna ch'ha passentà sia uffanza a San Murezzan ensemen cun dus giats en ina pitschna abitaziun a Madulain. Il viadi a la lavur daventia adina pli pretensius, causa sia protesa, ma era pervi dals numerus plazzals da construcziun ch'impedeschian adina puspè sia via.