L'inscunter da correspundentas e correspundents da «Ils Auters»

Dals 18 fin ils 22 da november ha gì lieu la segunda emna da barat naziunala da «Movetia», cun la SSR SRG sco partenaria da medias. Passa 3500 scolaras e scolars da l'entira Svizra han pudì prender part ad activitads da barat. Moderaturas e moderaturs da SRF, RTS, RSI e RTR èn era s'engaschads activamain ed han collavurà ad emissiuns dad autras regiuns linguisticas.

In tal barat interregiunal datti era en in tschert senn l'entir onn cun l’emissiun «Ils Auters». Ils 20 da november è stà il di dals correspundents da l’emissiun – ina chaschun per quels che fan «Ils Auters» da discurrer sur da l’emissiun, quai ch’els lessan accumplir, ma era sur da lur rapport cun las linguas.