Cun la refurma da las rentas 2020 vegnissan l’emprima e la segunda pitga maschadadas.
Dunnas duain lavurar fin 65
La vegliadetgna da pensiun da las dunnas duai vegnir auzada da 64 sin 65 onns. Ellas pajassan lura in onn pli ditg daners en l’AVS ed en la cassa da pensiun.
Sbassar tariffa da conversiun
La tariffa da conversiun (quai è l’import che vegn pajà mintga mais or da la cassa da pensiun) sa sbassass da 6.8% sin 6%. Uschia sa rimnassan là dapli daners per pajar ora la populaziun che vegn adina pli veglia.
Pajar dapli AVS e dapli cassa da pensiun
LavurantAs e patrunAs duain pajar mintga mais dapli en l’AVS ed en la cassa da pensiun. Uschia vulan ins puspè emplenir quellas cassas.
70 francs dapli per pensiunaris novs
Sco cumpensaziun che la tariffa da conversiun vegn sbassada, duain persunas che van da nov en pensiun survegnir 70 francs dapli il mais. Quai fiss il uschenumnà «zückerli»...
Taglia sin plivalur
La taglia sin plivalur s’augmentass dad 8 sin 8.3%. Quels 0.3 % dapli giessan en la cassa da l'AVS. En tut giessan dentant 0.6% da la taglia sin plivalur en l’AVS. 0.3% vegnissan stritgads da l’Assicuranza d’invaliditad e scumpartids en l’AVS. En tut survegn l’AVS lura 1.6% da la taglia sin plivalur.
Pensiun flexibla
Cun la refurma vegniss la pensiun flexibla tranter 62 e 70 onns. Dentant: Pli baud ch’ina persuna va en pensiun e pli pauc ch’ella survegniss mintga mais. Ed il medem vala per il cuntrari: Pli tard ch’insatgi va en pensiun e pli bler ch’el survegniss.
Tge sa mida?
Giuven Gion, fin 44 | Mamma Maria, 45 - 65 | Nona Nina, 65+ |
---|---|---|
- | - | Sin las rentas actualas n'ha la refurma nagin'influenza. |
- | La vegliadetgna da pensiun da las dunnas vegn auzada da 64 sin 65 onns. | - |
- | Per persunas davent da 45 è garantida la renta. Quella na po betg esser pli bassa che la renta ch'ellas avessan survegnì senza la refurma. | - |
Per novs pensiunaris vegn l’AVS auzada per 70 francs il mais. | Per novs pensiunaris vegn l’AVS auzada per 70 francs il mais. | - |
La tariffa da conversiun vegn sbassada da 6.8 sin 6%. | La tariffa da conversiun vegn sbassada da 6.8 sin 6%. | - |
LavurentAs e PatrunAs duain pajar mintga mais dapli en la cassa da l’AVS e la cassa da pensiun. | LavurentAs e PatrunAs duain pajar al mais dapli en la cassa da l’AVS e la cassa da pensiun. | - |
La cassa da pensiun duai vegnir obligatorica era per persunas che na gudognan tant (davent dad ina paja da 21’150 l’onn). | La cassa da pensiun duai vegnir obligatorica era per persunas che na gudognan tant (davent dad ina paja da 21’150 l’onn). | - |
La pensiun duai vegnir flexibla tranter 62 e 70 onns. | La pensiun duai vegnir flexibla tranter 62 e 70 onns. | - |
Pajar dapli taglia sin plivalur. Quella vegn auzada da 8% sin 8.3% | Pajar dapli taglia sin plivalur. Quella vegn auzada da 8% sin 8.3% | Pajar dapli taglia sin plivalur. Quella vegn auzada da 8% sin 8.3% |
Daco dus cedels da votaziun?
La refurma da las rentas consista ord dus projects - dus ch'èn colliads in cun l'auter. Perquai ston votantas e votants emplenir ora dus cedels da votar per ils 24 da settember 2017:
- Per l'ina vai per auzar la taglia sin plivalur dad 8% sin 8.3%. Quai pretenda ina midada da la lescha.
- Per l'autra cuntegn la refurma dentant anc bler dapli midadas, per exempel che las dunnas duain lavurar in onn pli ditg u che persunas che van da nov en pensiun duain survegnir mintga mais 70 francs dapli renta dad AVS. Per tut questas midadas dovri ina midada da la constituziun.
La refurma da las rentas va dentant mo en vigur sche la Svizra approvescha omadus projects.
Dicziunari da las rentas
Rumantsch Grischun | Tudestg |
---|---|
AVS Assicuranza per vegls e survivents | AHV Alters- und Hinterlassenenversicherung |
Tariffa da conversiun | Umwandlungssatz |
Taglia sin plivalur | Mehrwertsteuer |
RR actualitad