L’onn passà ha il Glacier Express registrà il segund meglier dumber da giasts da sia istorgia. Sco l’interpresa scriva è il dumber da giasts creschì per 10% sin 258’000. L'onn da record han 260'000 passagiers prendì in bigliet. Contribuì al success da l’onn passà haja tranter auter era la «Excellence Class» ch’ella haja lantschà, scriva la viafier. I sa tracta d'ina nova classa cun in ambient exclusiv, cun in plaz sper la fanestra garantì, service da concierge, in menu da gourmet e divertiment a bord. Il grond interess sin plaun naziunal ed internaziunal mussia ch’il Glacier Express saja anc adina ina da las experientschas da viafier las pli attractivas.
![Il nov interiur da la 1. classa dal Glacier Express.](https://www.rtr.ch/static/cms/images/960w/bda9693.jpg)
L'onn current po il Glacier express festivar in giubileum radund. Il 2020 èsi 90 onns che il tren ha fatg l'emprim viadi da Zermatt fin a San Murezzan. Gia la fin dal 2019 hajan ins cumenzà d'adattar l'interiur da la 1. e 2. classa a la purschida da la Excellence Class, hai num en la communicaziun.
Ord l'archiv
RTR novitads 16:00