Las delegadas ed ils delegads dals Verds han lantschà la sonda lur campagna per las proximas votaziuns federalas dal zercladur – quai sut il motto «Trais giadas GEA per il clima e la biodiversitad». Ils Verds s'engaschan uschia tant per in Gea a la lescha da CO2 sco er per las duas iniziativas agraras - quella per ina Svizra senza pesticids sintetics e quella per aua da baiver netta.
Er per la lescha da Covid-19 ha la partida decis in Gea. Quella saja in element central per superar la pandemia e sias consequenzas. A la lescha per cumbatter il terrorissem percunter dian ils Verds Na.
Survista da las parolas dals Verds
Iniziativa d'aua da baiver | Gea |
Iniziativa cunter pesticids | Gea |
Lescha da CO2 | Gea |
Referendum encunter lescha da Covid-19 | Gea |
Lescha davart mesiras da la polizia cunter terrorissem | Na |
Congedi per geniturs
Il president da partida Balthasar Glättli è sa drizzà cun in'idea a delegadas e delegads: La Svizra dovria in congedi per geniturs da mintgamai 18 emnas. El veglia tschertgar allianzas en la politica per realisar questa pretensiun. Il mument survegnan mammas in congedi da 14 emnas - ils babs dapi quest onn duas emnas.