Il producent da cuntels svizzer Victorinox lavura vi d'in nov cuntè da satg – ma senza cuntè. La raschun saja ch'il diever da cuntels vegnia regulà adina pli e pli fitg. Quai pervia da cas da violenza sin tut il mund, ha il schef da Victorinox Carl Elsener communitgà.
En tscherts martgads economics exista il maletg ch'i saja in'arma pervia dal cuntè.
En pajais sco l'Engalterra u tscherts pajais asiats dastgan per exempel mo pli persunas che dovran in cuntè per la lavur u activitads en la natira purtar in cuntè cun els. Cunzunt en las citads saja la lubientscha d'avair in cuntè fitg restrenschida.
Gia suenter l'attatga terroristica en ils Stadis Unids dals 9 da settember 2001 era la svieuta da Victorinox sa reducida per 30% sur notg. Tut quai mussia tenor Elsener al concern ch'ins na dastga betg sa far dependent be dad ina sparta da products. Sco alternativa ha Elsener l'idea da sviluppar in utensil multifuncziunal. Quel duain per exempel velociclistas e velociclists pudair duvrar.