Il Cussegl federal ha surlavurà sia strategia a lunga vista per promover il transport cun viafier. En il rom da questa promoziun focussava il Cussegl federal fin ussa sin eliminar stretgas e per in tact pli cumprimì. Quai en emprima lingia per pussibilitar megliers trens, dapli colliaziuns e punctual era colliaziuns pli curtas.
Cun ils proxims pass e projects da schlargiament vul il Cussegl federal da nov focussar sin optimar las colliaziuns a distanzas curtas e medias. Quai per exempel cun dapli purschida da trens urbans e regiunals e cun revalurisar staziuns da viafier en aglomeraziuns. Quai resulta da la strategia surlavurada «Viafier 2050» che la cussegliera federala Simonetta Sommaruga ha preschentà.
Tar las colliaziuns en l'exteriur vul il Cussegl federal sustegnair surtut là, nua che la viafier munta in dischavantatg cumpareglià cun il traffic sin via. La finamira qua saja da pudair reducir punctualmain la durada dal transport. E tar il traffic cun rauba duain surtut indrizs logistics e plattafurmas per transtgargiar. Uschia quinta il Cussegl federal da contribuir ina gronda part per cuntanscher las finamiras da clima.
Sper quai ha il Cussegl federal era decidì midadas tar projects gia existents. Tranter auter da schlargiar la lingia tras il tunnel da basa dal Lötschberg sin dus binaris – quai per augmentar la stabilitad dal manaschi, però era per evitar da stuair serrar el dal tuttafatg durant lavurs. Per quai e plirs ulteriurs projects surtut en aglomeraziuns prevesa il Cussegl federal in credit supplementar da 720 milliuns francs. Pia quella summa ch'ins n'è betg vegnì da cumpensar auter.
La proposta va en consultaziun enfin ils 14 d'october 2022. La decisiun dal parlament davart ils proxims pass e projects per schlargiar la rait è previa da il 2026.