Tgi che vul sa laschar vaccinar cunter Covid-19 po vinavant far quai gratuitamain. La Confederaziun surpiglia ils custs da la vaccinaziun fin mez dal 2024. Quai ha il Cussegl federal decidì – i sa tracta d'ina prolungaziun da las reglas existentas. Betg pajadas vegnan vaccinaziuns en apotecas. Il Cussegl federal è da l'avis che las pussaivladads en las praticas da medi da chasa, en ils ospitals ed en ils centers da vaccinaziun tanschan.
A partir da mez 2024 quinta il Cussegl federal ch'il martgà garanteschia la dumonda e perquai vegnan las vaccinaziuns betg pli pajadas da la Confederaziun a partir da la segunda part da l'onn 2024.
Protecziun per persunas da ristg
La vaccinaziun porschia vinavant ina buna protecziun cunter grevs andaments da la malsogna, ospitalisaziuns ubain la mort. Quai scriva il Cussegl federal vinavant. La vaccinaziun saja vinavant in instrument central per proteger persunas vulnerablas.